2023·01·13
2021ean zehar, Udalak, Hiritik At enpresaren laguntzarekin, parte hartzeko prozesu bat garatu zuen: "jolastuko al gara". Prozesuaren helburua herrian dauden jolasguneak identifikatzea, aztertzea eta eraberritu beharreko eremuetan irizpideak ezartzea zen. Hori guztia bi fasetan garatu zen:
- 1. fasea, aurrelanketa: jolasguneak identifikatu eta aztertu ziren Gaztelekuko nerabeekin eta Herri Eskolako haurrekin batera.
- 2. fasea, emaitza: Sei jolas-gune berritzeko irizpideak zehaztu ziren:
- Apeztegi parkea: trebatzeko ur-eremua.
- Gazteleku ingurua: nerabeen topagunea.
- Sagardo plaza: gune urbanoa.
- Pelotari plaza: adierazpen gunea.
- Murgia parkea: trebatze gune naturala.
- Ibai-parkea: belaunaldien arteko aisialdi-gunea.
Sei horietatik, hiru gune berrituko dira, eta obrak egingo dira datozen urteetan: Murgia, Sagardo plaza eta ibai-parkea.
Murgiako jolas-eremua
Murgiako eraldaketa abenduko obra batzordetik pasa eta alkatearen dekretu bidez onartu da. Laster jarriko da martxan obra esleitzeko lehiaketa.
Egingo den eraldaketaren oinarria partaidetza-prozesuan lortutako informazioa izan da.
Murgiaren kasuan, inguruko elementu naturalak aprobetxatuko dira, haurrei zuzendutako trebatze- eta esperimentazio-gune bat sortuz.
Sortuko diren jolasguneetako batzuk hondartegia (garai bateko iturria erabiliz), oreka-gunea (sareak, enborrak, harriak, sokak) eta trebatzeko eremu naturala (malda erabiliz) izango dira, besteak beste.
Proiektuak 66.013,27 euroko aurrekontua izango du.
