ASTIGARRAGAko
Udala

Aurrez aurreko bisiten bitartez, herriko ostalari eta merkatariak Astigarragako euskararen mapara batzeko kanpaina egingo da. Komertzioetan edota ostalaritzan euskara erabiltzeko gomendioak nahiz eredu eta jarraibide egokiak eskainiko zaizkie profesionalei. 2026ari begirako helburua da Bai Euskarari Elkartearen aholkulariek Astigarragako 60 saltokirekin harremana egitea eta lehenengo urtean 30 entitatek Bai Euskarari ziurtagiria eskuratzea.

Ekainean zehar garatuko da lehen fasea; merkataritza eta zerbitzu-estrablezimenduekin emango zaio hasiera egitasmoari. Aurrera begira, helburua da ostalaritza sektorera zabaltzea proiektua, taberna, jatetxe eta sagardotegiekin osatzeko herriko euskararen mapa.

Asmoa da saltokien ahalegina aitortzea, aholkularitza eskaintzea hizkuntza kudeaketarako eta planifikaziorako neurriak abiatzeko eta, bide batez, baita sare-lana bultzatzea ere. Hala, bezero euskaldunei eskaintzen zaien zerbitzua modu errazean hobetzeko aukera eskainiko zaie sektoreko eragileei.

Nola? Bada, lanketa hori guztia Bai Euskarari Ziurtagiriaren bitartez egingo da. Izan ere, ziurtagiriak euskara erabiltzako eta sustatzeko lanean ari diren enpresak, saltokiak eta era guztietako entitateak identifikatzen, aitortzen eta pausoak ematen laguntzen du. Tresna eraginkorra da oso; gainera, hiru maila ditu Bai Euskarari Ziurtagiriak:

• Zerbitzua eta lana euskaraz: euren bezeroei zerbitzua euskaraz eskaintzen dieten, eta gainera, euren lan-jarduna euskaraz garatzen duten entitateak.
• Zerbitzua euskaraz: euren bezeroei zerbitzua euskaraz eskaintzen dieten entitateak.
• Euskararen bidean: zerbitzua euskaraz eskaintzera iritsi ez arren, horretarako bidea abiatu duten entitateak.

Ziurtagiria eskuratzeko prozesuan, Bai Euskarari Elkartearen aholkularia izango dute bidelagun establezimenduek; ziurtagiria eskuratu, aurrera begirako urratsak adostu eta garatzeko baliabideak eskaintzeko. Aldi berean, norberak bere entitatean hizkuntza-egoera zein den ezagutzeko auto-diagnostiko tresna ere jarriko da sektoreko eragileen eskura.

Lehen bisiten ondoren, parte hartzea erabakitzen duten entitateekin beste hitzordu bat jarriko da, eta ordu eta erdi baino gutxiagoan, entitatearen edo komertzioaren euskararen diagnostikoa egingo diete. Horren arabera, dagokien ziurtagiri-maila erabakiko da eta entitateei laguntza emango zaie, beren beharrak asetzeko.

Egitasmoan parte hartzen duten entitate guztien erregistroa egingo da, Astigarragako saltokien euskararen mapa osatzeaz gain. Saltoki bakoitzaren hizkuntza egoera, beharrak eta interesak jasoko dira datozen urteetarako lanketei segida emateko.

Udaletik adierazi dutenez, “eguneroko inertziak astindu” nahi ditu ekimenak. Ainara Vazquez Martinez euskara saileko zinegotziak adierazi duenez, “bi norabidetako eragina dugu ipar; herriko saltokietan bultzada bat eman nahi diogu euskarari eta, bide batez, baita herriko saltokiei ere, euskararen bidez”.

Zalantzarik gabe, eremu estrategikoa da arlo sozioekonomikoa euskararen normalizazioari begira. Horrexegatik, euskaraz lan egiteko eta zerbitzua emateko aukeretan eragiten jarraitzeko erabateko determinazioz jarraituko du lanean Astigarragako Udalak.