Bost urte beteko dituen honetan Eragiyokek Ahober ahots berdinen abesbatza zikloa antolatuko du Astigarragan
2023·05·30
Lehenengo ekitaldia hiru kontzertuz osatuta egongo da:
- Ekainak 3: Jatorki Ahots Zuriak (Bilbo) – Astigarragako eliza.
- Urriak 7: Voces Graves de Madrid – Erribera kulturgunea.
- Abenduak 23: Eragiyok + organoa + harizko boskotea – Astigarragako eliza.
Ziklo honekin Eragiyokek Astigarragako, inguruko herrietako eta Gipuzkoako kultura eskaintza handitzea bilatzen du, gutxiago landutako esparru batean, ahots berdinen taldeena. Horrekin, ahots berdinen errepertorioa zabaltzeko egindako lanari jarraipena ematen dio. Izan ere, bost urteko ibilbide honetan ahots berdinetarako egindako ia ehun obra desberdin abestu ditu, euskal egileenak izanik horietako hirurogeita hamabost.
Zikloak ikuspegi hori handitzea ahalbidetuko du, ahots zurietarako eta ahots grabeetarako idatzitako Euskal Herriko eta nazioarteko egileen obren bitartez, hemengo eta hango abesbatzekin, urtez urte ospatzeko asmoarekin jaio den hitzorduan.
