2021·01·22
Astigarragako Udalak Bat, Bi ta Hiru gizarte-berrikuntzako aholkularitzarekin batera 2020ko otsailean Galtzaur elkartearen egungo egoera eta oraina ezagutzeko, eta horrela bere etorkizuna eraiki ahal izateko proiektu bat abiatu zuen. Proiektua aurrera eramateko uneoro egon dira Galtzaur Jubilatuen elkarteko zuzendaritza-batzordearekin lankidetzan.
Partaidetzazko proiektu bat da lantzen ari dena, bazkideen kolektiboak Galtzaur elkarteari buruzko iritzia eman du eta bere funtzionamendurako etorkizunerako proposamenak sortu ditu. Horretarako, inkesta bat bidali zitzaien bazkideei, eta lau ildo nagusi jorratu ziren: kudeaketa; egitura; komunikazioa eta parte-hartzea eta inplikazioa. Bazkideek lau lerro horiei buruzko galderei erantzun zieten, eta emaitzak hausnarketa-jardunaldian azaldu ziren.
Hausnarketa-jardunaldia
Udalak eta Galtzaur elkarteko lehendakariak egin zuten aurkezpena. Ondoren, Bat, Bi ta Hiru gizarte-berrikuntzako aholkularitzak gidatu zuen saioa.
Lehenengo, inkestan ateratako emaitza eta ondorioak azaldu zitzaizkien bazkideei.
Ondoren, taldeka, hainbat dinamika egin ziren Galtzaur elkartearen inguruko gaiak jorratzeko: jarduerak, komunikazioa hainbat mailatan, partehartzea eta inplikazioa.
Balorazioa
Adineko pertsonek arretaz entzun zituzten inkestaren emaitzak, eta espero ez zituzten emaitzak ere atera zirela aipatu zuten.
Taldeka gustura aritu ziren lanean, iritziak partekatzen. Taldeetan egindako lana bateratu zen ondoren eta denon artean partekatu, horrek hausnarketa sakona egiteko aukera eman zuen eta puntu interesgarriak atera ziren.
Beraz, saio produktiboa izan zen, eta garbi ikusi zen Astigarragako adineko pertsonak gogotsu daudela etorkizun batean ekintzak antolatu eta aurrera eramateko, badutela Galtzaur Jubilatuen elkartea bizirik mantentzeko ilusioa.
Hurrengo pausuak
Martxoa hasieran urteroko batzarra ospatuko du Galtzaur elkarteak. Bertan, egungo egoera eta kontuak aurkezteaz gain, hausnarketa-jardunalditik ateratako ondorioak ere azalduko zaizkio bazkideei.
