Albisteak

Atzealdea Ekainak 28: LGTBIQ+ Harrotasunaren Eguna

Baimenak
Ekainaren 28an LGTBIQ+ Harrotasunaren Nazioarteko Eguna ospatzen da. Hori dela eta, Udalak Adierazpen bat onartu zuen ekainaren 21eko bozeramaileen batzordean, aho batez. Era berean, ekainaren 28aren inguruan antolatu diren ekimen eta mobilizazioetan parte hartzeko deia egiten die herritarrei.

2024·06·27

LGBTIQ+ HARROTASUNAREN EGUNARI BURUZKO ADIERAZPENA

Ekainaren 28an, LGBTIQ+ harrotasunaren egunean, harro gaudela aldarrikatu nahi dugu. Harro gaude gure bizitzez, harro gure genealogiaz eta harro LGBTIQ+ mugimenduaz.

Komunikabide nagusienen estigmatizazio saiakera ezberdinek zein manipulazioak, eskuin muturreko diskurtso intoleranteek eta gorroto jarrerek cisheteroarautik kanpo kokatzen diren bizitzak ezabatu nahi dituzten honetan, inoiz baino garrantzitsuagoa da nondik gatozen gogora ekartzea, ospatzea eta aldarrikatzea. Stonewalletik Euskal Herrira, milaka bizipen, galera, aldarrikapen eta lorpen izan ditugu, baina oraindik egiteko asko dugu. Eraso LGBT+fobikoen salaketen datuak esponentzialki egin dute gora azken urteetan, LGBT+ pertsonen inbizibilizazio eta bazterketak presente jarraitzen du gure bizitzako arlo guztietan, diskurtso patologizatzaileak ugaritzen ari dira… eta ondorioz gure bizitzak arriskuan daude.

Honen guztiaren aurrean, antolatzea eta borrokatzea ezinbestekoa dugu. Gure kasuan, instituzioetatik politika publiko integral eta sendoak, perspektiba feministan oinarritutako zerbitzuak, babes kolektiborako eta autodefentsarako mekanismoak ezartzeko bideak… ezartzea ezinbestekoa dugu. Anekdotikoak diren politikak alde batera utzi, eta estrukturalak diren horiek erdigunean jartzeko garaia da. Horretan ari gara eta hori sustatzen jarraituko dugu, askoren artean eta elkarlanean.

Horregatik guztiagatik, onartu berri dugun “Astigarragako Emakume eta Gizonen Berdintasunerako 2030 planean” jaso bezala, konpromisoa hartzen dugu:

  • Herriko LGBTIQ+ pertsonen errealitatearen inguruko ezagutza handitzeko ikerketak egin eta ekintza-plan bat abiatzeko.
  • LGBTIQ+ pertsonen bisibilizazioa eta errespetua lantzeko sentsibilizazio ekimenak antolatzeko.
  • Prozesu hauek, herriko LGBTIQ+ mugimenduko kideekin batera egiteko konpromisoa hartzen dugu eta egon ezean, erreferente eta norbanako ezberdinak aktibatzeko moduak sustatuko ditugu.

Honetaz gain, dei egiten dugu Ekainaren 28aren bueltan antolatu diren ekimen eta mobilizazioetan parte hartzeko, eta amaitzeko, LGBTIQ+ pertsonen bizitzak egunerokotasunean bizigarriak izateko, lan eta borrokatzen ari diren kide eta kolektibo guztiak zoriondu nahi ditugu, harrotzeko moduko mugimendua osatzen dugulako.

Gora Ekainaren 28a!