Indarkeria matxista gaitzesteko ekintzak antolatu dituzte herriko hainbat eragilek Udalarekin batera, azaroan zehar.
2022·11·10
2003tik aurrera, emakumeonganako indarkeriari buruzko datuak jasotzen hasi zirenetik, 115 emakume eta 11 haur erailak izan dira Euskal Herrian. Zenbaki onartezin honen atzean izenak eta izanak daude. Azaroaren 25a Indarkeria Matxistaren Kontrako Nazioarteko Eguna denez Astigarragako herriak indarkeria matxista gaitzetsi nahi du.
Helburu horrekin hainbat ekimen egongo dira datozen bi astetan helduentzat, gazteentzat eta nerabeentzat. Antolatzaileak Udala eta herriko hainbat eragile izan dira, hala nola, Emakumeon Etxea, Xaguxar, Gazte Asanblada eta Gaztelekua.
- Azaroaren 14an, 18:00etan, Erriberako erakusketa-gelan, indarkeria matxistari buruzko hausnarketa eragiteko, inVISIBLES proiektuaren berri emango egongo da, honekin batera, proiekzioa eskainiko da, ondoren Emma Larretaren testigantza eta amaitzeko solasaldia. Indarkeria matxistaren biktima gisa, Emma Larretak, lehen pertsonan, bere bizipenak eta esperientzia kontatuko dizkigu. (Adingabekoen zaintza zerbitzua behar izanez gero, beranduenez ekintza baino bi egun lehenago abisatzea eskatzen da, emailez berdintasuna@astigarraga.eus helbidera edo telefonoz 6638206586 zenbakira).
- Azaroaren 20an, 19:00, Erriberako auditorioan Carlota Peredaren “Cerdita” película emango da.
- Azaroaren 22an, 18:00etan, Emakumeon Etxean, “Gazteak harremanez hausnartzen” solasaldia izango da Maitena Usabiagak gidatuta, Plax! Bikote eta sexu aholkularitzako sexologoak.
- Azaroaren 23an nerabeek erailketa matxisten murala sortuko dute. 17:00etan Gaztelekutik abiatuko dira eta Herri Eskolako burdin hesian zintzilikatuko den murala osatuko dute elkarlanean. Erailketa matxisten kontaketa hasi zenetik (2003tik) Euskal Herrian erail dituzten 115 emakume eta 11 adin txikiko omentzeko, euren oroimenezko txartelak eskegiko dira muralean.
- Azaroaren 25ean bertan, bi ekintza nagusi egingo dira:
- 12:15ean Udalak deitutako kontzentrazioa (Udaletxe aurrean).
- 18:30ean Emakumeon Etxeak deitutako manifestazioa. Kontxa Etxeberria plazatik abiatuko da manifestazioa, herrian zehar ibilbidea egingo da oinez, danbor soinuz girotuta, eta Emakumeon Plazan amaituko da.
- Bukatzeko, AMAK taldearen kontzertua izango da azaroaren 26an, 20:00etan, Erriberako auditorioan.
Gainera, urriko Plenoan Udaleko hiru alderdiek aho batez indarkeria matxista gaitzesten duen adierazpen instituzionala onartu dute.
