2025·10·29
Atzo Astigarragako Emakumeon Etxean "Gure Herriko señorak" erakusketaren irekiera ekitaldia egin zen, Andrea Loinaz Maizcurrena eta Eider Ugarte Rodriguez astigartarren ikerketa proiektu batean oinarrituta.
"Astigarragako emakumeen ekarpenak eta bizi-historiak (1940-2000)" izeneko azterlana Astigarragako Udaleko Berdintasun Sailak 2023an argitaratu zuen genero-ikuspegidun ikerketa-bekatik dator, Astigarragako emakumeen memoria historikoa berreskuratzeko, balioesteko eta herritarren eskura jartzeko helburuarekin.
Guztira, herriko berrogeita hamar bat herritarrek omendutako emakumeak babestu nahi izan zituzten. Ainara Vázquez Martínez Berdintasuneko zinegotziak nabarmendu zuen garrantzitsua dela iraganean berdintasunaren alde borrokatzen lagundu zuten eta aitzindariak izan ziren emakume horien bizitzei balioa ematea. Errekonozimendu honekin, omendutakoek Astigarragaren historiari egindako ekarpena nabarmendu nahi da, ispilu eta erreferente izan daitezen astigartar neska eta gazteentzat. Hori 15 emakume horien bizitzak eta testigantzak jasotzen dituzten bi argitalpenetan islatu da.
Berexi Art estudioa osatzen duten Miren eta Uxue Bereziartua Lonbide artistek diseinatutako hainbat panelek osatzen dute erakusketa. Omendutako emakume astigartarren erretratuak, esaldi bat eta bideoekin lotu den QR kode bat daude erakusketan. Bertaratutako herritarrek erakusketaren kalitate handia nabarmendu zuten. Material hori guztia udal webgunean dago eskuragarri "Gure herriko señorak" izeneko atalean.
Erakusketa urriaren 30etik azaroaren 14ra egongo da zabalik Astigarragako Emakumeon Etxean, honako ordutegian:
- Astelehen, astearte eta ostiraletan: 9:00-15:00
- Ostegunetan: 13:00-19:00
Informazio gehiago: berdintasuna@astigarraga.eus
