Albisteak

Aholkularitza juridikoa Astigarragako Emakumeon etxean

Emakumearen lan munduarekin lotutako aholkularitza zerbitzua eskainiko du Astigarragako Emakumeen etxeak ekainaren 18tik aurrera. Zerbitzu honen berri emateko, aurkezpena ostiralean, 18:00etan egingo da Emakumeon Etxean.

2021·06·17


Maiatzean Astigarragako Emakumeon Etxeak ateak ireki zituen. Espazioa Joseba  Barandiaran plazan kokatua dago.

Lokalaren lagapena 15 urterako egin da. Beraz, Emakumeon Etxea sortu berria den arren, proiektu egonkorra eta sakona izango da. Herrian, giltzarri izango den proiektu soziala eta feminista da. Proiektu honen helburu nagusiena Astigarragako emakumeak ahalduntzea, saretzea eta ekimen feministak sustatzea da; prestakuntza eta informazioa eskainiz, ikuspegi feministatik eztabaida eta gogoeta piztuz.

Ekimen horien baitan, aholkularitza juridikoa jasotzeko aukera izango da bertan ekainaren 18tik aurrera. Zehazki, lan munduarekin loturiko aholkularitza zerbitzua izango da: eszedentziak, jubilazioak, nominal, finikitoak, lan-baimenak, E.R.E eta E.R.T.E ...

Helburua Astigarragako emakumeak lagundu, beraiek dituzten zalantzak juridikoki erantzun eta aholkatzea da. Kasu bakoitzeko arreta emango da. Hau da, arreta pertsonalizatua eskainiko da; doan eta konfidentzialtasunez. Genero ikuspegitik, emakumeon diskriminazio, babesgabetasun eta indarkeria egoeren inguruan laguntza eskainiko da.

Arreta aurrez aurrekoa izango da Astigarragako Emakumeon Etxean, Barandiaran plaza, 23. zk. Hitzordua hartzeko ondorengo posta elektronikora bidali behar da mezua:  emakumeonetxea.astigarraga@gmail.com